Район пащэм сабыймэ адыгабзэ-ныдэлъфыбзэр зэраIулъым, зэрэзэрагъашIэрэм зыщигъэгъозагъ.

КIэлэцIыкIу IыгъыпIэм Зезэрэхьэ Фатимэ адыгабзэм зэрэдэлажьэхэрэ шIыкIэхэу агъэфедэхэрэм нэIуасэ афишIыгъ. КIэлэпIухэм сабыим иныдэлъфыбзэ Iулъэу агъэсэным пае пшысэхэр, тхыдэжъхэр, гущыIэжъхэр, усэхэр, рассказ цIыкIухэр, джэгукIэхэр зэрэзэрагъашIэрэр къафиIотагъ.

КIэлэцIыкIу IыгъыпIэм музей цIыкIу «Адыгэмэ яхъишъ» ыцIэу иI. КIэлэцIыкIухэр ижъыкIэ адыгэмэ агъэфедэщтыгъэ Iэмэ-псымэхэм, адыгэ щагум, адыгэ хъулъфыгъэ ыкIи адыгэ бзылъфыгъэ шъуашэхэм нэрылъэгъоу нэIуасэ ащыфашIых. Сабый цIыкIухэр адыгэ лъэпкъым ихъишъэ ашIэнымкIэ, ашIогъэшIэгъоны хъунымкIэ ишIогъэшхо ащ къэкIо.

ОшIэ-дэмышIэу къахэхьэгъэ хьакIэхэм сабыйхэр къащымыукIытэхэу, адыгабзэкIэ зэрагъэшIэгъэ усэ цIыкIухэр чанэу къаIуагъэх.

Аулъэ Рэщыдэ сабыймэ ащытхъугъ ыкIи адыгабзэкIэ зэдэгущыIанхэу ялъэIугъ, унэм зыкIожьхэкIи зэрэадыгэхэр ащымыгъупшэхэу, адыгабзэкIэ янэ-ятэхэм адэгущыIэнхэу атыригъэпытыхьагъ.

«ГухэкIэу щыт нахь мышIэми, мы аужрэ илъэсхэм тэлъэгъу адыгабзэ-ныдэлъфыбзэр икъоу тисабыйхэм зэраIумылъыр.

Бзэр апэ къызщежьэрэр унагъор ары. Бзэр сабыим ышIэным пае унагъом исхэр ыбзэкIэ дэгущыIэнхэ фае. Ау гухэкIми, адыгэ унэгъуабэмэ мэхьанэ ратырэп сабыим ыбзэ зэришIэн фаер. Икъоу къагурыIорэп ныдэлъфыбзэм икъэухъумэн тэщ фэдэ лъэпкъы цIыкIухэмкIэ мэхьанэу иIэр. Ащ ыужкIэ мэхьанэшхо зиIэр кIэлэцIыкIу IыгъыпIэхэр ары,»-къыхигъэщыгъ район пащэм. Урысыбзэм дакIоу, адыгабзэр Iэпэдэлэлы амышIынэу кIэлэцIыкIухэр зыпIухэрэм, зыгъасэхэрэм зафигъэзагъ Аулъэ Рэщыдэ.