Ныдэлъфыбзэм идэхагъэ, ижъынчыгъэ, икъэбзагъэ рыгушхэхэу кIэлэцIыкIу IыгъыпIэу "Насып-1" щапIурэ кIэлэцIыкIухэу купэу "Еппыр-2" исхэм къэгъэлъэгъон гъэшIэгъонхэр ныдэлъфыбзэм и Мафэ фэгъэхьыгъэу къашlыгъэх.

Зэхахьэм пшъэрылъэу иIагъэхэр - сабыйхэм ныдэлъфыбзэр шIу алъэгъунэу, бзэр аIулъынэу, зэрэгъашIэ ыкIи рыгущыIэхэ ашIоигъоныр ары.

Зэхахьэм ипэублэ Панеш Марзет ытхыгъэ усэ дахэу "Ныдэлъфыбзэр - сиадыгабз" зыфиIорэм кIэлэпIур къеджагъ. Ащ лъыпытэу джэгукIэхэу "Хэт къыIон, хэт къышIэн?", зэпыщыт гущыIэхэр зыфиIохэрэмкIэ Iоф адишIагъ. Хырыхыхьэхэр къаригъэшIагъ, IурыIупчъэхэр къаригъэIуагъ. Ахэм анэмыкIэу илъэсым мазэу илъхэр, уахътэу илъэсым иIэхэр, ахэр зэрызэрэхъокIыхэрэр къаригъэIуагъэх. КIэлэцIыкIухэр усэхэм къяджагъэх, орэд дахэхэр адыгабзэкIэ къаIуагъэх. 

Ини, цIыкIуи агу рихьырэ пшысэу "ПэIо плъыжь" зыфиIорэр сценкэ къашIыгъ. Ащ хэлэжьагъэх ныо цIыкIур, мамэр, пшъэшъэжъыер, тыгъужъыр, мэкъуаохэр. 

ЗэIукIэм икIэухым кIэлэцIыкIухэм хэбзыкIыгъэ тхыбзэхэмкIэ "Тыбзэр тиадыгабз" къатхыгъ. Ахэр чэфэу, чанэу, ягуапэу зэкIэ джэгукIэхэм ахэлэжьагъэх. 

Сценариер зэхэзгъэуцуагъэр ыкIи зэIукIэр зезыщагъэр кIэлэпIоу Михадэ Роз, IэпыIэгъу фэхъугъэхэр ГутIэ Оксан, Мамгъэт Свет.