Зэнэкъокъур къызэIуихыгъ ыкIи зэрищагь тхылъеджапIэм иIофышIэу Сет Фатимэ. Адыгабзэмрэ, лъэпкъ хабзэмрэ, ныдэлъфыбзэмрэ шIу зэрэплъэгъун, зэрэбгъэшIон фаер сабыйхэм къафиIотагъ.

- Лъэпкъыр лъэпкъы зышIырэр, ар щызгъаIэрэр, хэхъоныгъэ езыгъэшIырэр, ыпэкIэ лъызгъэкIуатэрэр бзэр ары. Ар щэIэфэ лъэпкъыр мэпсэу, мэлажьэ -, къыхигъэщыгъ ащ игущыIэ пэублэ.

Зэнэкъокъум хэлэжьагъэх ыкIи яIэпэIэсэныгъэ къыщагъэлъэгъуагъ илъэсихым щегъэжьагъэу илъэс пшIыкIуплI зыныбжь кIэлэеджакIохэр. Ахэм ныдэлъфыбзэр шIу зэралъэгъурэр къахэщэу, тилъэпкъ итхакIохэу Жэнэ Къырымызэ, МэщбэшIэ Исхьакъ, Бэрэтэрэ Хьамид, Нэхэе Руслъан, ШэкIо Абрек, Дэрбэ Тимур аусыгъэ усэхэм IупкIэу къяджагъэх.

Гупчэ тхылъеджапIэм ипащэу Хьамыцу Зарэ кIэлэеджакIоу зэнэкъокъум хэлэжьагъэхэм тхьауегъэпсэу ариIуагъ, усэу къызэджагъэхэр зэхахьэм къекIолIагъэхэми, жюрийми агу зэралъагъэIасыгъэр къыхигъэщыгъ., ыкIи текIоныгъэ къыдэзыхыгъэ сабыйхэм ацIэхэр къариIуагъ. 

Апэрэй чIыпIэр агощи, Шъаокъо Мыхьамэтрэ, Щыкъ Дианэрэ, ЖакIэмыкъо Дианэрэ афагъэшъошагъ.

ЯтIорэй чIыпIэр зэфагощыгъ Хьагъундэкъо Саидэрэ, Инухъу Аидэрэ, ДышъэкI Джэнэтрэ. 

Ящэнэрэй чIыпIэр аратыгъ Ламэкъо Маринэрэ, Датхъужъ Миланэрэ, ЖакIэмыкъо Даринэрэ.