УсакIоу, орэдыIоу, композитэрэу, хореографэу, фольклорым иугъоякIо-иухъумакIоу, кIэлэегъаджэу КIубэ Щэбанэ къызыхъугъэр илъэсишъэрэ щэкIрэ зэрэхъугъэм фэгъэхьыгъэ зэхахьэ Шэуджэн районым игупчэ тхылъеджапIэ щырекIокIыгъ.
ЗэIукIэм чанэу хэлэжьагъэх гурыт еджапIэхэм ащеджэрэ кIэлэеджакIохэр.
ТхылъеджапIэм иIофышIэхэр КIубэ Щэбанэ ищыIэныгъэ ыкIи итворческэ гъогу къекIолIагъэхэм игъэкIотыгъэу къафаIотагъ.
КIубэ Щэбанэ щылэмазэм и 15-м 1890-рэ илъэсым къуаджэу Хьакурынэхьаблэ къыщыхъугъ. Къуаджэм дэтыгъэ ублэпIэ еджапIэри, мэщытым хэтыгъэ медрысери къыухыхи, Нальчик дэтыгъэ динлэжьхэм апае кIэлэегъаджэхэр къэзыгъэхьазырырэ семинарием 1917-рэ илъэсым кIэхьагъ, 1919-рэ илъэсым къыухыгъ. 1919-1925- рэ илъэсхэм Хьакурынэхьаблэ еджапIэм адыгабзэмкIэ щыригъэджагъэх.
Театральнэ техникумэу Краснодар къыщызэIуахыгъэм 1933-1936-рэ илъэсхэм, нэужым, Москва дэт театральнэ институтэу А.В.Луначарскэм ыцIэ зыхьырэм иадыгэ студие 1936-1937-рэ илъэсхэм артист хъущт ныбжьыкIэхэр адыгабзэмрэ, адыгэ литературэмрэкIэ ащыригъэджагъэх.
Адыгэ ансамблэм изэхэщэнкIэ, ащ иIофыгъохэр зехьэгъэнымкIэ Iофышхо Щэбанэ ышIагъ. Орэдым хэлъ гущыIэхэри ыусэу, орэдышъори къыхихэу щытыгъ. КIэлэцIыкIухэм апае орэдыбэ ытхыгъ. Адыгэ профессиональнэ музыкэм икъежапIэ Щэбанэ Iут, ащ хэхъонымкIэ, зиIэтынымкIэ бэ ышIагъэр.
Лъэпкъ литературэм, искусствэм, культурэм лэжьыгъэшхо щишIагъ. Адыгэ IорыIуатэхэр, анахьэу лъэпкъ орэдхэм якъэугъоижъынкIэ макIэп ышIагъэр.
КIубэ Щэбанэ 1943-рэ илъэсым ихэгъэгу ыбгынэнэу мэхъу. Германием, Тыркуем ащыпсэугъ. 1956-рэ илъэсым Францием, Канны дэсыгъ, Сорбон университетым Iоф щишIагъ. 1959-рэ илъэсым къыщыублагъэу, дунаим ехыжьыфэ Америкэм щыпсэугъ.
КIубэ Щэбанэ тыдэ зимыгъэзагъэми ихэгъэгурэ, иадыгагъэрэ щыгъупшэу зы мафи къыхэкIыгъэп.
Щэбанэ опсэуфэ анахь гумэкI инэу иIагъэр - илъфыгъэ закъоу Саид-зэрэсабыеу къызэрэщинагъэм щэгъэжьагъэу, дунаим ехыжьыфэ игупшысэхэмкIэ ыкIи ипкIыхьэхэмрэ ахэтыгъ. Ипшъашъэ фэгъэхьыгъэу усэ дэхэкIае ытхыгъ.
Мамхыгъэ гурыт еджапIэу 4-м ащеджэрэ кIэлэеджакIохэр КIубэ Щэбанэ гум къикIырэ, гум лъыIэсрэ иусэхэу "Кавказ", "Джэнэты чIыгушъы", "Лъэпкъым пай", "Кавказым игимн" ыкIи нэмыкIхэми къяджагъэх, орэдхэр къаIуагъ.
