Мамхыгъэ⠀къоджэ псэупIэм идинлэжьэу, ефэндэу Хьагъундэкъо Азэмат республикэм ыкIи Шэуджэн районым ис быслъымэнхэм гущыIэ лъэIухэмкIэ закъыфегъазэ:⁣⁣⠀

- Бисмиллахьи рахьмани рахьим! Алахьэу лъапIэу, лъагэм щытхъур зэкIэ фэтэгъазэ! Аллахьам зынэшIу къызыщифэн быслъымэн жъугъэх, непэ зыкъышъуфэзгъазэмэ сшIоигъу. ⁣⁣⠀

Апэрэу сызэрышъолъэIущтыр Аллахьэ лъапIэу тыкъэзгъэхъугъэм зыфэтэжъугъэгъази тежъугъэлъэIу тигунахьхэр къытфигъэгъунэу. Мы къекIокIырэ узым тыщиухъумэнэу дуIа лъапIэхэр фэтэжъугъэшIых, ТхьамкIэ тишIошIхъуныгъэ тэжъугъэгъэпыт.⁣⁣⠀

ХэтыкIи шъэфэп кIочIэшхо хэлъэу непэ тикъэралыгъо узым зыкъызэрыщиIэтыгъэу, тиреспублики ыкIи Шэуджэн райоными щыщ цIыфэу ыгъэсымаджэхэрэм япчъагъэ мафэ къэс нахьыбэ зэрыхъурэр ыкIи, гухэкI нахь мыхъуми, зидунай зыхъожьырэр. ⁣⁣⠀

Сэ сшъхьакIи къасIомэ сшIоигъу, икIыгъэ илъэсым сиIахьылхэу нэбгыриплI дгъэIылъыжьыгъ, Тхьам ыпашъхьэ иуцожьыгъэх (Аллахьэм ягунахьхэр афегъэгъух, япсапэхэр афегъэбагъох, джэнэт Iахьыл ешIых).⁣⁣⠀

Тизэхахьэхэр нахь макIэ тэжъугъэшIых. КъызгурэIо, тхъагъор мэхъу, нэшхъэигъор мэхъу. Ахэр зэкIэми тизэфэд. Ау непэ къекIокIырэ вирусым къыхэкIыкIэ куп Iужъоу узэхэмыхьэмэ нахьышIу. Ари къытгурыIон, тицIыфышъхьэ къэтыухъумэн фае. ⁣⁣⠀

Лъэшэу сышъолъэIу ушъыякIо шъузыдахьэкIэ, шъукъэуцужьэу шъущымытэу, IэпэубытынымкIи щыIэныгъэ къызхэжъугъафи, зидунай зыхъожьыгъэм дуIа къыфэшъушIи, къэнагъэхэм Тхьа шъуакъыфелъэIуи, шъуIэхэр къэжъугъэкъэбзэжьыхи⠀шъукъыдэкIыжь.⁣⁣⠀

Унэм бзылъфыгъэхэм шъуяушъыинэу нэбгырэ тIурытIу-щырыщэу шъуихь, затешъуIубэу афэшъумыгъай. Зыщышъумгъэгъупш, унагъохэу шъузэрыхьэжьыщтыхэм нэжъ-Iужъыхэр ыкIи сабыйхэр арысых, ахэмэ япсэуныгъэ шъуегупшыс, сакъыныгъэ зыхэжъугъэлъ. ⁣⁣⠀

Мыхэм адиштэуи къасIомэ сшIоигъу, маскэ пIулъыщтымэ зи укIытагъо хэлъэп. Быслъымэн цIыфым хьакъэу телъым ащыщ къэбзэныгъэр, арышъы ащыкIэ пыуты е Iае тыхъурэп, типсауныгъэ къэтэухъумэ.⁣⁣⠀

ЕтIани къасIомэ сшIоигъор, мы вирусэу къекIокIырэм цIыфхэм агучIэ рихыгъ, щынэм ригъэубытыгъэх. Ащ къыхэкIыкIи къяутэкIырэ узым нахь пэшIуекIогъуае ешIых, къарыур аIехы.

Мыщ дэжьым зыщыдгъэгъупшэ мыхъущтыр зэкIэри зыIамычIэ илъыр Аллахьталэр арышъ, зыфэдгъэзэн телъэIун фае псынкIэ къытфишIынэу, типсауныгъэ къыухъумэнэу. ЦIыфым иман пытэ иIэмэ, ыгуи нахь къабз, нахь пыт. ТхьалъэIум ыгу нахь къегъэушъэбы, гупшысэ дэихэр шъхьащехы.

Хабзэм къыгъэуцугъэ санитарнэ-шапхъэхэр зэкIэми тизэфэдэшъ, тымыукъохэу, тызэдиштэу тэжъугъэгъэцак1эх, узым тызэлъешъумыгъашт. Зы сымаджэ купышхом къызхэкIыкIэ, зэкIэри ыгъэсымэджэн ылъэкIыщт. Типсауныгъэ къэтэжъугъэухъум.

Тхьам ынэшIу къытщэф, иман пытэ къытет, иIумэтхэм ащыщ тешI. Амин!