«Бзэрабзэ, бзэрабзэ, сиадыгабзэ!» ыц1эу Хьакурынэхьаблэ дэт кIэлэцIыкIу IыгъыпIэу «Насып» зыфиIорэм зэхахьэ щырекIокIыгъ.

Зэхахьэр зыгъэхьазэрыгъэхэр ыкIи чэфэу, фэкъулайхэу зезыщагъэр кIэлэпIухэу группэу «Еппэр-4» ащылажьэхэу Михадэ Розэрэ Индрис Динарэрэ. Орэдхэр къязгъэIуагъэр, къэзгъэшъуагъэхэр Мамгъэт Свет. 

- Сыфай кIэлэцIыкIухэм адыгабзэр шIу язгъэлъэгъунэу, яныдэлъфыбзэ рыгущыIэнхэу, еджакIэм, тхакIэм фэкъулайхэу къэтэджынхэу. Джары пшъэрылъ шъхьаIэу сиIэр, - еIо Михадэ Розэ.  

КIэлэцIыкIухэми Iэдэбныгъэр ахэлъэу, чанэу къэгъэлъэгъонхэм ахэлэжьагъэх. Ахэр усэхэмэ IупкIэу къяджагъэх, лъэпкъ къашъохэр дахэу къашIыгъэх, орэдэу «Си Адыгееу сихэку» агу къадеIэу къаIуагъ, хырыхыхьэхэр ашIогъэшIэгъонэу къашIагъэх, IурыIупчъэхэр фэIaзэхэу псынкIэу къаIуагъэх.  

Пшысэу «Машэрэ ыкIи Мышъэмрэ», джэгукIэу «ТхьакIумкIыхь" зыфэпIощтхэр  гъэшlэгъонэу къагъэлъэгъуагъэх, бзыпхъэ дахэхэр хаупкIыгъэх. КIэлэцIыкIухэр дзыо хьалэмэтым иIабэхэзэ, къырахырэ пкъыгъом ыцIэ адыгабзэкIэ къаIуагъ. Зыгъэпсэфыгъо такъикъхэм джэгукIэ кIакохэу «Бзыу, бзыу», «Унагъо» къашIыгъэх.  

ЗэIукIэр къашъоу удж хъураекIэ аухыгъ. 

Зэкlэ шIэныгъэу адыгабзэм кIэлэцIыкIухэм фыряIэр  къэзыушыхьэтыщт тхылъ хьэлэмэтым датхагъэх.