Динлэжьхэм къызэрэхагъэщырэмкIэ, къурIан Iэятэ лъапIэхэу цIыфхэм гъогу зафэр языгъэлъэгъухэрэр а мазэм къехынэу рагъэжьагъ. НэкIмазэр шIушIэным, нэкIым, тхьэлъэIум афэгъэхьыгъ, псэмрэ гупшысэхэмрэ егъэкъабзэ.

Мамхыгъэ мэщытым иIимамэу Хьагъундэкъо Азэмат бэрэскэшхо хъутбэм хэтэу НэкIмазэм мэхьанэу иIэр, ащ епхыгъэ шапхъэхэр, ахэр быслъымэнхэм зэрагъэцэкIэн фаем щигъэгъозагъэх мэщытым къекIолIагъэхэр.

-НэкIыр ислъам диным ипкъэуитфымэ зэу ащыщ, быслъымэн пэпчъ ар ыгъэцэкIэн фае.

НэкIмэзэ мазэм цIыфым игупшысэхэм якъэбзагъэрэ, иIиман ипытагъэрэ, ишIушIэмэ яшъыпкъагъэрэ къыщэлъагъо. Тхьэ Закъом нахь пэблагъэ ухъунымкIэ, игъогу занкIэ урыкIонымкIэ, уишIушIагъэхэм ахэбгъэхъонымкIэ охътэ псынкIэу, охътэ лъапIэу Алахьталэм Рэмэзан мазэр къытфигъэкIуагъ.

НэкIмазэм ихьатыркIэ Алахьэм цIыфым амалышхо къыреты гъогу тэрэз рыкIонымкIэ, хэукъуагъэми зигъэтэрэзыжьынымкIэ.

Мы мэзэ лъапIэм гунахьыри, псапэри лъэшэу мэбагъо. Аллахьталэр цIыфым имэлэкIалIэ щыкIэрэкIэ арэп нэкIыр ащ къызфытырилъхьагъэр, ар гъогу зафэ теуцоным, хъярэу мы мазэм хэлъхэр къылъыIэсынхэм пае нахь. НэкIмазэм цIыфым ипсэуныгъэ, идунэететыкIэ федэ афэхъунэу бэ хэлъыр: мыхъунхэм ар ащеухъумэ, ишхэнкIи, игъолъынкIи гъэнэфагъэ горэ хэлъы ешIы, Iэпкъ-лъэпкъыр егъэрэхьаты, цIыфхэр зэкъотынхэм, шIу зэрэлъэгъунхэм, гукIэгъу къахэфэным фегъасэх.

УнэкIынэу узеуцуалIэкIэ, нэф къэмышъызэ ебгъэжьэнышъ, тыгъэр къохьэфэ уинэкI зыукъощтмэ защыбдзыезэ пщэIэшъун фай. Угу илъри, пшIэри зэдиштэу Тхьэр разэ зэрэпшIыщтым уфэлэжьэн фай- къыхигъэщыгъ игущыIэ Iимамым.

Хъутбэм икIэух мэщытым иIимамэу Хьагъундэкъо Азэмат быслъымэнэу Шэуджэн районым исхэм афэлъэIуагъ мы мэзэ лъапIэм Алахьым икъоу фэIорышIэнхэу къарыурэ амалрэ къаритынэу, къабыл афишIынэу, Аллахьам ихъярырэ игукIэгъурэ къалъигъэIэсынэу, рахьатныгъэрэ, гушъэбэныгъэрэ, мамырныгъэрэ къахилъхьанэу.