Адыгэхэм Илъэсыкlэр зыщыхагъэунэфыкlыщтыгъэ маф. Ащкlэ тилъэпкъэгъухэм тафэгушlо ыкlи Тэу Аслъанрэ Нуриетрэ ятхьалъэlу щыщ пычыгъо афэтэгъазэ!
Дунэешхор зылэжьыгъэу,
ЩымыIэр къэзыгъэхъоу
Къэхъурэр зэлъэIоу, шIогъабэ зытэу,
Ытырэм кIэмышъугъужьырэ
Ти Тхьэшхо лъапIэ
Илъэсэу къихьэрэм ехъулIэу
Адыгэ лъэпкъым пае телъэIу.
Тыдрэ чIыпIи щыпсэурэ адыгэхэм
Насыпыр къытэбэкIэу, узи бзаджи къытщаухьэу,
Тызэрыс хэгъэгумэ пый къафыкъомыкIэу,
Пый къыкъокIыгъэми тинасып текIоу,
ТыздэщыIэм огъуи гъабли зауи къынэмысэу,
Уаимэхэр IэкIыб тфэхъухэу,
Игъуаджи екIагъи къытхэмыкIэу,
ШIугъэм фэтыузэнкIэу,
Мамыр щыIэкIэ тхъагъо
ИлъэсыкIэм Тхьэм зэкIэхэми къытфехь.
Тинасып дахэу, тигугъэхэр лъагэхэу,
Тиакъыл щэрыоу, тигъашIэ кIыхьэу,
ТицIыфышъхьэ бэгъо зэпытэу,
ТызыкIэхъопсырэр тIэмычIэ къихьэу,
ТызэрэIыгъэу, тызэрэлъытэу,
Тинахьыжъхэр дгъашIохэу, дгъэгушхохэу,
Яжьау бэрэ Тхьэм тшъхьащегъэт.
⠀
Тисабыйхэр IорышIэхэу, пIугъошIу-лэжьыгъошIу,
Тхьэм тфешIых.
ТиIэгухэр ренэу хъяр кIуапIэхэу,
ЛIышIу епсыхыпIэхэу,
Тищагумэ псэуалъэр адизэу,
Тиунэхэр ордэунэжъхэу,
УнэпIэ мафэхэу, цужъы укIыпIэхэу,
Къихьэрэмэ къырахьэу, икIырэмэ къыранэу,
ТигушIуагъуи тигъомыли зэпымычхэу,
Тхьэм зэкIэ адыгэхэм илъэсыкIэм щыIэкIэшIу къытет.
⠀
Тиунагъомэ ацIэкIэ тылъаIомэ,
Хыкъумым фэдэу изыр тигъэщэу,
ПцIэпцIэжъэу зэгочырэр тишъуатэу,
ТиконычIэ изытхъырэр лэжьыгъэшIоу,
Лы пщэрхэр тилыкъумэ апизыбзэу,
Тишъэжъыяцэ Iузыгорэр лыжъэу,
Тибжьэматэмэ шъоур адизэу,
Хъун-шхыным илъэс реным Тхьам тыщемыгъакI.
⠀
Орэд къэзыIорэр типшъашъэу,
Имызэу гущыIэрэр тинысэу,
Тисабый мыгъэу, гъэр къытхэмыкIэу,
Нэшхъэигъэр тимакIэу,
Тихъярмэ янахьыбэр нысащэу,
Щыгъын кIэракIэхэр тишъуашэу,
Тиуашъо къаргъоу, тичIылъэ шхъуантIэу,
Тимэщи тиIэщи тфэбагъохэу,
Илъэсым тылэжьыщтыр
Тхьэм гухэхъо шхыны тфешI.
Лъэгъун-лъэгъун тиIэу,
Гухэлъ дахэкIэ тышэсымэ, тигъогухэр бзэпсхэу,
Типсыхэр щэнджхэу, чыжьэу тынэсэу,
ТызфэкIуагъэр къыддэхъоу,
Къэдгъэзэжьмэ тIэмычIэхэр ушъагъэхэу,
БылымышIу къэтхьэу, къэтхьыгъэр тфэбагъоу,
Тхьэм зэкIэхэми илъэ
