Адыгэмэ яилъэсыкlэ мэфэкl фэгъэхьыгъэ зэхахьэ Хьатыгъужъыкъое къоджэ псэупlэм къуаджэу Къэбэхьаблэ щырекlокlыгъ. Ащ къырагъэблэгъагъэх Шэуджэн районым ипащэу Аулъэ Рэщыд, районымкIэ депутатхэм я Совет итхьаматэу Мэрэтыкъо Аслъан, чылэм инахьыжъхэр ыкlи нэмыкlхэри.

Мэфэкl зэхахьэр ижъыкlэ илъэсыкlэр зэрэхагъэунэфыкIыщтыгъэм фэдэу Къэбэхьаблэ дэт Культурэм иунэ ыкIи районымкIэ Культурэм игупчэ иIофышIэхэм зэхащагъ. Ижъырэ адыгэ орэдхэмкIэ, къэшъо дахэхэмкIэ ыкIи джэгукIэ зэфэшъхьафэхэмкIэ зэхащэр баигъэ. МэфэкIыр адыгэ джэгукIэ зэфашIыжьыгъ. 

Сыдыгъокlи адыгэмэ илъэсыкlэр гъэтхапэм и 21-рэм агъэмэфэкlыщтыгъэ. А мафэм гъэмрэ кlымрэ зэхэкlэу аlо. Мы мафэм дунаими изытет фэдэу илъэсыкlэр щытыщт аlо тинахьыжъхэм. Дунаир рэхьатэу, мафэр ошlу зыхъукlэ, гъэу къакlорэр гъэбэжъу хъущт. Ижъыкlэ къыщегъэжьагъэу илъэсыкlэм ипэгъокlэу хьамыщхунтlэ чъыг агъэкlэракlэщтыгъэ. Ащ шэкl къолэн зэфэшъхьафхэр, ыкlи къое гъугъэ такъырхэр пашlэщтыгъэх, былымэу аукlыгъэм шъо цlынэу къытырахыгъэри чъыгым тыраубгъоу яхэбзагъ. Чъыгым къутамибл пытэу къагъотыщтыгъэ, зэреджэщтыгъэхэр „чъыг удж“. Чъыг уджым lанэ хъураеу къыкlэрытыр гъомлапхъэм изынахьдэгъухэу щыlэхэр тырагъэуцощтыгъэ, илъэсыкlэу къихьэрэм ялэжьыгъэхэмрэ, мыхьамелэмрэ щымыкlэнхэу ябылымхэр афигъэбэгъонхэу аlоти, Тхьам елъэlущтыгъэх.