Тхьаумафэу блэкIыгъэм Къэбэхьаблэ къоджэ шIыхьаф щырекIокIыгъ.
Чылэ гупчэм ит мэщытым зы мафэкIэ бгъагъэ (навес) къыIуашIыхьагъ.
Хьатыгъужъыкъое къоджэ псэупIэм ипащэу Къэрэбэт Къэплъан къызэрэхигъэщыгъэмкIэ, Iофым кIэщакIо фэхъугъэр къуаджэу Къэбэхьаблэ ихэгъэхъон дэлажьэрэ фондыр ары.
Ячылэ гупсэ зишIуагъэ езыгъэкIы зышIоигъохэу, цIыф чан губзыгъэхэу Къэбэхьаблэ дэсхэм апкъ къикIыкIэ , Фондыр 2018 илъэсым зэхащагъ.
Илъэсым ыкIоцI Фондым ыгъоигъэ ахъщэм щыщэу сомэ минишъэрэ шъэныкъорэм кIахьэу бгъагъэм ишIын пэIухьагъ.
Къэрэбэт Къэплъан тхьаегъэпсэушхо ариIуагъ Фондым ипащэу, чылэ тхьаматэу агъэнэфагъэу Цэй Бислъан ыкIи гупыкI зиIэхэу, Къэбэхьаблэ ихэгъэхъон фэгуIэхэрэ чылэдэсхэу зиIахьышIу мы Iофым къыхэзылъхьагъэм.
«Уаи мэхъу, тыгъи мэхъу, джы быслъымэн мэфэкIхэри, хьэдэгъэ фэIо-фашIэхэри гупсэфэу мэщыт щагум щызепхьан плъэкIыщт» - разэу къыхигъэщыгъ къоджэ-псэупIэ тхьаматэм.
