Ш1эныгъэхэмк1э докторэу, Дунае Адыгэ академием иакадемикэу, Хьакурынэхьаблэ иц1ыф гъэсагъэмэ ащыщэу Гъыщ Нухьэ фэгъэхьыгъэ зэхахьэ районымк1э лъэпкъ културэм игупчэ щырек1ок1ыгъ.

Зэхахьэм къырагъэблэгъагъэх апшъэрэ классхэм ащеджэрэ к1элэеджак1охэр.

«Нухьэ игъогу зэхэк1хэр»- шъхьэу зэхахьэм и1агъэр.

Районым игупчэ библиотекэ и1офыш1эхэм къек1ол1агъэхэр Гъыщ Нухьэ ищы1эныгъэ гъогу нэ1уасэ фаш1ыгъэх, наукэм гъэхъагъэу щиш1ыгъэхэм щагъэгъозагъэх.

Илъэс т1ок1ит1ум ехъу Нухьэ Адыгэ научнэ-ушэтэк1о институтщтыгъэм, джы гуманитарнэ ушэтынхэмк1э Адыгэ Республикэм иинститут щэлажьэ. А илъэс пчъагъэм къак1оц1 ш1эныгъэлэжьым тхыгъэ 300 фэдиз къыхиутыгъ, тхылъ шъхьафэу 10-м ехъу къыдигъэк1ыгъ.

Зэхахьэм ик1эщак1оу районым ипащэу Аулъэ Рэщыдэ къызэрэхигъэщыгъэмк1э, мы зэхахьэр апэрапш1эу зыфэгъэхьыгъэр къытк1эхъухьэрэ ныбжьык1эхэр ары. Гъыщ Нухьэ фэдэ ц1ыф губзыгъэхэу, гупшысэ куу зыкъолъхэу, тыбзэ, тихабзэ дэлажьэхэрэм зэдэгущы1эгъу афэхъухэмэ тикултурэ, тыбзэ икъэухъумэн, ихэгъэхъон иш1огъэшхо къэк1онэу ар щэгугъу.

Ш1эныгъэлэжьыр ищы1эныгъэ щыщ хъугъэ-ш1эгъэ гъэш1эгъонхэмк1э къадэгощагъ, ныдэлъфыбзэр зэрэпш1эн фаер къэзыушыхьатхэу, бзэр к1одымэ, хабзэри, ащ уж итэу лъэпкъыри зэрэк1одыщтыр нэрылъэгъу къэзыш1ырэ гупшысэхэр, щысэхэр зэхахьэм къек1ол1агъэхэм къафихьыгъ. 

Нухьэ лъэшэу гуапэ щыхъугъ, тик1элэеджак1охэр ежь ытхыгъэ усэхэм ащыщхэм езбырэу къызэреджагъэхэр. 

Икъоджэ гупсэ осэ ин зэрэщыфаш1ырэр къэзыушыхьатырэ тхылъэу «Хьакурынэхьаблэ иц1ыф гъэш1уагъ» зыфи1орэр Хьакурынэхьаблэ къоджэ псэуп1эм ипащэу Беданэкъо Валерэ тич1ыгогъу лъап1э фигъэшъошагъ.