Ижъык1э къыщэгъэжьагъэу адыгэхэм шэн-хэбзэ дахэхэр зэрахьэх. Ахэмэ ащыщ мэхьанэшхо зэратэу, илъэс зыныбжь сабыим апэрэ лъэбэкъур зэридзырэм мэфэк1ышхок1э зэрэхагъэунэфык1ыщтыгъэр.

Ащ фэдэ шэн-хэбзэ дахэхэр амыукъоу, ащымыгъупшэу, къуаджэу Хьакурынэхьаблэ щыпсэурэ Гъонэжьыкъо Расул ц1ык1ум лъэтегъэуцо игъэк1отыгъэу фаш1ыгъ. Расул ц1ык1ур мылъэпаоу, темыфэу, игъогу занк1эу, пэрыохъу имы1эу рык1онэу Тхьа фелъэ1ухэзэрэ шъэжъыек1э лъэпэлъахъэр тырахыгъ. Ижъырэ хабзэм тетэу Расул инанэу Ритэ фиш1ыгъэ тэбэрыдзэм тырагъэуцугъ, ащ мэхьанэу и1эр Расул ц1ык1ур хъун-шхын щымык1эу, бэрэчэтэу псэунэу ары.

Ащ лъыпытэу сабый ц1ык1ум ищы1эныгъэ зэпхыгъэщт сэнэхьатыр зэрагъэш1энэу 1энэ хъураем пкъыгъо зэфэшъхьафхэр тыралъхьи ахагъэ1эбагъ. Щэ зыхэ1абэм блокнот, пожарнэ машин ык1и ахъчэ зэрэзэращэрэ машинэ къыхихыгъ.

Расул ц1ык1ур еджэгъэшхоу, гъэсэгъэшхоу хъунэу, псэуныгъэ пытэ и1эу, ищы1эныгъэ гъогу нэфынэу, л1ыгъэшхо хэлъэу щы1энэу, хэгъэгул1эу, гъэш1э насып и1энэу тыфэлъаlо!