Мы мафэхэм Шэуджэн районым игубгъохэм lоныгъор етlупщыгъэу ащэкlо.
Охътэ кlэкlым къыкlоцl чlэнагъэ имыlэу бжыхьасэхэр зэрэlуахыжьыщтхэм чlыгулэжьхэр яшъыпкъэу пылъых.

Бжыхьэсэ лэжьыгъэу къырахыжьырэмкlэ пэрытныгъэ зыlыгъыхэм ащыщ мэкъумэщ- хъызмэтшlапlэу "Зезэрахьэ" зыфиlорэм.
Хъызмэтшlапlэм ипащэу Зезэрахьэ Аслъан гущыlэгъу тыфэхъугъ, lоныгъор зынагъэсыгъэр, гъэхъагъэу яlэхэм тащигъэгъозагъ.
Зезэрахьэ Аслъан зэхищэгъэ хъызмэтшlапlэр игъэхъагъэхэмкlэ сыдигъокlи къахэщы. Аслъан иlофшlэн хэшlыкlышхо фыриl. Аужрэ шапхъэхэм адиштэрэ шlыкlэхэмкlэ мэлажьэ, зэрифэшъуашэу губгъо lофшlэнхэр зэкlэ егъэцакlэх.

Хъызмэтшlапlэм ипащэ къызэрэтиlуагъэмкlэ мыгъэ хьэр къызщагъэкlыгъэр гектар 60-щ хъущтыгъэ. Охътэ кlэкlым къыкlоцl хьэр lуахыжьыгъ. Зы гектарым гурытымкlэ центнер 45-рэ къытыгъ.

Мэфэ ошlухэр къызыфагъэфедэзэрэ нахь мэхьанэ зиlэ лэжьыгъэу-коцым, иlухыжьыни лъагъэкlуатэ, гектар 210-рэ ащ рагъэубытыгъ. Гурытымкlэ зы гектарым центнер 60-щым ехъоу къырахы.
Чылапхъэхэу "Адель", "Таня", "Антонина", "Юка" зыфиlохэрэ лъэпкъыхэр ары хъызмэтшlапlэм ыпхъыгъэхэр, ахэм зэрэщыгугъухэу дэгъоу зыкъагъэлъэгъуагъ.

Хъызмэтшlапlэу "Зезэрахьэр " техникэкlэ зэтегъэпсыхьагъ. "Дон" зыфиlорэ комбайнитlумкlэ чlэнагъэ фэмыхъоу лэжьыгъэр lуахыжьы.

Зыгъэпсэфыгъо ямыlэу, хэшlыкlышхо фызиlэ комбайнерхэм чанэу, агу етыгъэу lоныгъор зэрифэшъуашэу рагъэкlокlы. Биктюшин Шигапрэ , Зезэрахьэ Бислъанрэ пшъэрылъэу яlэр щытхъу хэлъэу зэшlуахы.
Зэуж итхэу машинэхэмкlэ лэжьыгъэр хьамбарым ащэ. Акlэзыщырэ машинэхэм арысых Шъаокъо Батырбийрэ, Бгъошэ Муратрэ.

Iоныгъор хъызмэтшlапlэм ыкlэ щыфэкlо. Къэнэгъэ коц гектар 40-р ощх къемыщхымэ мэфэ заулэкlэ къаухыщт. Ау ащ яlофшlэн къыщыуцурэр. Лэжьыгъэр зытетыгъэ хыпкъхэм тракторхэр арыхьащтых, чlыгур агъэхьазырыщт.

Мэкъумэщ - хъызмэтшlапlэу "Зезэрахьэм" гъэхъэгъэ дэгъухэр иlэхэу lоныгъор ыухынэу, ыпэкlи иlофшlэн хигъэхъонэу тыфэлъаlо!