Адыгэ Республикэм ыкlи Пшызэ шъолъыр ащыпсэурэ быслъымэнхэм ащыщэу мыгъэ нэбгрэ тlокlищрэ пшlыкlутфырэ хьадж ашlынэу шышъхьаlум и 10-м Чабэм ежьэщтых. Ахэм ахэтыщтых къ.Мамхыгъэ щыщхэу зэшъхьагъусэхэу Хъуажъ Рустемрэ Фатимэрэ.

Ислъам диным ипкъэухэм хьаджыр ятфэнэрэу щыт. Амал, кlуачlэ зиlэ быслъымэныр хьаджэ кlоныр ипшъэрылъэу ары сыдигъуи зэрэщытыр.

Чабэм укlоныр илъэс къэс нахь хьылъэ мэхъу зэпыт-диныр зыштэрэр нахьыбэ мэхъу, ащ къыхэкlыкlэ хьаджэшl кlонэу фаехэми япчъагъэ хэхъо.Ау ащ цlыфэу дафэрэр лъытагъэу зэрэщытым къыхэкlыкlэу, кlонэу фаехэм зэк1эми ар къадэхъун алъэкlырэп.
"Насыпышхо Алахьталым къытитыгъ, тэ ащ инэу тыкlэхъопсыщтгъэ" , - аlо зэшъхьагъусэхэм.

Хъуажъ Рустем район гупчэ сымэджэщым илъэсиблым ехъугъэу юристэу щэлажьэ. Рустемрэ ишъхьагъусэу Фатимэрэ унэгъо дахэ зэдашlагъ, лъытэныгъэр азыфагу дэлъэу мэпсэух, зы сабый илъэсищ ыныбжьэу зэдапlу, джыри хахъо яlэнэу ежэх.

Хъуажъ Рустем къызэрэтиlуагъэмкlэ янэжъэу Мыlуминэт ары диным имэхьанэ къыгурызыгъэlуагъэр, ащ фэзыщагъэр.

Гъогу кlыхьэ, гъогу къин зэшъхьагъусэхэр зытехьащтыхэр. Арафат бгым дэкlоещтых, тыгъэр къохьажьыфэ Тхьэм елъэlущтых. Меккэм тхьамэфищэ къэтыщтых.

Рустемрэ Фатимэрэ ягъогу псынкlэ къафэхъунэу, псэухэу, узынчъэхэу къэкlожьынхэу, ятхьалъэlухэр къабыл афэхъунэу тафэлъаlо!