Гъэтхапэм и 2-м общественнэ организациеу "Адыгэ Хасэмрэ" "Шууей Хасэмрэ" культурэм иунэу къ. Хьакурынэхьаблэ дэтым зэIукIэ щызэхащэгъагъ.

ХьакIэхэм апэгъокIыгъ, ыкIи шIуфэс гущыIэ апигъохыгъ Шэуджэн районым ипащэу Аулъэ Рэщыд. Ащ игущыIэ къыщыхигъэщыгъ мыщ фэдэ Iофтхьабзэхэм лъэпкъымкIэ шIогъэшхо зэрахэлъыр. Ти адыгэ лъэпкъ бэгъонэу, тисабыйхэм шэн-Iэдэбыр ахэлъэу щыIэнхэу афэлъэIуагъ.

Адыгэ Хасэм итхьэматэу ЛIымыщэкъо Рэмэзани, организацием хэтхэри зэIукIэм къыщыгущыIагъэх. Бзэм, хабзэм, адыгагъэм ибаиныгъэ, идэхагъэ, ащ кIочIэшхоу яIэр къыраIотыкIыгъ. Адыгабзэм, лъэпкъым итарихъ язэгъэшIэн, ныбжьыкIэхэм пIуныгъэ-гъэсэныгъэ куу ягъэгъотыгъэным, лъэпкъым зиугъоижьыным Хасэр зэрэпылъыр ащ къыхагъэщыгъ.

Хабзэмрэ бзэмрэ якъэухъумэн зэIукIэм къыщытегущыIагъ шIэныгъэлэжьэу Бырсыр Батырбий. Бзэр тIумылъыжьымэ зэрэлъэпкъэу тызэрэкIодыжьыщтыр, бзэм изакъоп, тикультурэ дахи, тишэн-хабзи ащ зэрэдэкIодыщтхэр игущыIэ къыриIотыкIыгъ.

Адыгэхэм ахэлъыгъэ хэбзэ дахэхэм зыкъаIэтыжьыным, шым ишIуагъэ зыхашIэжьыным, адыгэ шъуашэм изехьан зиушъомбгъуным дэлажьэрэ общественнэ организациеу "Шууей Хасэм" ипащэу Тлъэпшъэкъо Альберт зэхахьэм ныбжьыкIэхэм гущыIэгъу щафэхъугъ. Шууей Хасэр къызэрежьэнэу зэрэхъугъэр, зэрэзэхащагъэр, адыгэшым гъогоу къыкIугъэр, ижъыкIэ къыщегъэжьагъэу шымрэ адыгэлIымрэ щыIэныгъэм пытэу зэрэзэрипхыгъэр, лъытэныгъэшхоу, уасэу шым фашIыщтыгъэр ащ къафиIотагъ.

Непэ адыгэ лъэпкъыр зыгъэгумэкIырэ упчIэ зэфэшъхьафхэм зэхахьэм щытегущыIагъэх, щыкIагъоу алъэгъухэрэм яеплъыкIэхэр къыраIотыкIыгъэх.

Район гупчэм ит культурэм иунэ щылэжьэрэ лъэпкъ фольклорнэ купэу "Нартшъаом" зэхахьэм къекIолIагъэхэм "Адыгэхэм яорэд" къафиIуагъ. Гурыт еджапIэхэм ащеджэрэ кIэлэеджакIохэми, бзэм, лъэпкъым фэгъэхьыгъэ усэхэм къяджагъэх. Шууей Хасэм ащ шIухьафтын цIыкIухэри къафигъэшъошагъ. 

Нахь игъэкIотыгъэу зэIукIэм къыщаIэтыгъэ Iофыгъохэм, Шэуджэн районнэ телевидением икъэтынхэм шъущяплъын шъулъэкIыщт.