Шэуджэн районым хэхьэрэ къоджэ-псэупlэу Пщычэу быслъымэн диныр зылэжьэу дэсхэм апае мэщыт щашlыгъ. Мэщытым ишlын ухэлэжьэным мэхьанэшхуи псапи зэрэхэлъхэр икъоу зэхашlэзэрэ, яlуи - яшlи зэтефэу чылэм дэс нахьыжъхэри, ныбжьыкlэхэри, Гупчэ дин организациеу АР-м ыкlи Пшызэ шъолъыр ащыпсэурэ быслъымэнхэм я Дин дэлэжьапlи, район пащи, къоджэ - псэупlэ пащи пытэу зэкъотхэу мэщытым ишlын лъагъэкlуатэ. 

Тхьэлъэlупlэм гъэцэкlэжьын  lофшlэнхэр зынагъэсыгъэм зыщигъэгъозагъ Адыгеимрэ Пшызэ шъолъырымрэ ащыпсэурэ быслъымэнхэм ямуфтиеу Къэрдэнэ Аскэрбий,ащ пэгъокlыгъэх район пащэу Аулъэ Рэщыдэрэ, Хьатыгъужъыкъое къоджэ-псэупlэм ипащэу Къэрэбэт Къэплъанрэ. Мэщытыр зэгъэкlугъэу шlыгъэ. Ыкlоцl гъэцэкlэжьын lофшlэнхэр аухыгъ, дэпкъыхэр зэщиз ашlыгъэх, пчъэхэр, шъхьангъупчъэхэр кlэу хагъэуцуагъ, псыр ещэлlагъ. Нэмаз зыщашlырэ унэр хъоо-пщау ыкlи гуlэтыпl. Мэщытым хабзэу чlэлъым диштэу хъулъфыгъэхэмрэ бзылъфыгъэхэмрэ зэхэмыхьэхэу амдэз зыщаштэрэ чlыпlэри зэтеутыгъ. 

Iофыбэ хагъэкlыгъ, ау къэнагъэри  макlэп. Джыри щагур зэтырагъэпсыхьащт, къашlыхьащт, жьаупlэ фашlыщт, мэщытым ыгъуни чъыгхэр щагъэтlысыщт. Жъи кlи, хъулъфыгъи, бзылъфыгъи мэщытым ипчъэхэр афызэlухыгъ. Тхьэлъэlу щагур зызэтырагъэпсыхьащтыр охътэ теубытагъэ иlэп, ау къэзгъэпсынкlэн зылъэкlыщтыр зэдеlэжьынымрэ псэпэшlэнымрэ арых. Iофыр кlэзыщыхэрэм Тхьэм псынкlэ къафешl.