Къуаджэу Пщычэу непэ илъэс пчъагъэрэ зэжэгъэхэ мэщытыр къыщызэIуахыгъ. Ащ фэгъэхьыгъэ зэхахьэм хэлэжьагъэх Адыгеим ыкIи Пшызэ шъолъыр щыпсэурэ быслъымэнхэм ямуфтиеу Къэрдэн Аскэрбий, АР хэутын IофхэмкIэ икомитет ипащэу Шъхьэлэхъо Аскэр, Шэуджэн районым иапащэу Аулъэ Рэщыд, район Советым идепутатхэм япащэу Мэрэтыкъо Аслъан, динлэжьхэр.

Мэщытым ишIын 2011 илъэсым аублэгъагъ, гупыкI зиIэхэм ямылъкукIэ ар ашIыгъ, нэбгырэ 60 фэдиз чIэфэщт, къатитIумэ хъулъфыгъэхэмрэ бзылъфыгъэхэмрэ шъхьаф-шъхьафэу нэмаз ащашIынэу зэтырагъэпсыхьагъ.

Зэхахьэм къекIолIагъэхэм зэкIэми шIуфэс сэлам къарихыгъ Шэуджэн районым ипащэу Аулъэ Рэщыд. Ащ къыхигъэщыгъ, непэ мэщытэу къуаджэм къыщызэIуахырэр чылэдэсхэм лъэшэу зэрящыкIэгъагъэр, цIыфхэм гумэкIыгъо зэращыхъущтыгъэр илъэс пчъагъэм ыкIоцI мэщыт зэрямыIагъэр.

Непэ къуаджэу Пщычэу къыщызэIуахыгъэ мэщытыр республикэмкIэ пштэщтмэ я 47 —рэ мэщыт.

Къэрдэн Аскэрбий игущыIэ къыщхигъэщыгъ Ислъам дин къабзэм игъэпытэн, ащ гушъхьэбаиныгъэу къытырэм ныбжьыкIэхэр хэщагъэхэ хъумэ, республикэми, тикъэралыгъуи мамырныгъэмрэ зэгурыIоныгъэмрэ зэращыпытэщтхэм уицыхьэ телъы зэрэхъущтыр.

Джащ фэдэу къоджэдэсхэм къафэгушIуагъэх

АР хэутын IофхэмкIэ икомитет ипащэу Шъхьэлэхъо Аскэр, къуаджэу Еджэркъуае иефэндэу Бжьэц Пщымаф, Хьатыжъыкъое къоджэ псэупIэм инахьыжъхэр.